কাশ্মীরে ভোটর অঙ্ক ৩৭০

কাকেই ঃ জম্মু—কাশ্মীরে বিধানসভার ভোটর অঙ্ক হান ৩৭০ ধারাকে ধরিয়া করানি লাগতই। জম্মু কাশ্মীরে ৩৭০ ধারা বাতিল করানির পিছেদে পয়লাকার বিধানসভার ভোটহান এহান। ১ অক্টোবরে ভোট লমইল। ফল হারপানি আহের ৮ অক্টোবরে।
কাশ্মীরর মুসলমানর অন্তরেত্ত ৩৭০ ধারারে এবাকাউ হবাই পাহুরে নুয়ারেছি। বা মাতানি য়াকরের — আজি পেয়া তানুর ৩৭০ ধারা বাতিলর “ঘা” উহান না হুকেছে। উহান বিধান সভার ভোটর প্রচারর সময়ত শা শা করে দেহানি য়াকরলো। বিজেপিয়ে ৩৭০ ধারা বাতিল করিয়া কাশ্মীরর উন্নতি করিয়াউ থাকা — কট্টর পন্থী মুসলমানর মনর কোন উন্নতি নাউ অইতই। মেহবুরা মুফতি বালা বা ফারুখ আব্দুল্লার গোষ্ঠীয়ৌ বুলিক হাবির থতাত আকহান কথাহান— বিজেপিয়ে ৩৭০ ধারা বাতিল করিয়া তানুর স্বাধীনতা ক্ষুন্ন করানি অইল, কাশ্মীররতা ক্ষতি করানি অইল। ভোটে জিঙিয়া বারো ৩৭০ ধারা বহাল করানি। তবে বহু বেয়াপ া খুশী অছি, মাত্তারা ‘তিন তালাক’ বাতিল করিয়া মোদিয়ে বেয়াপার জনম রক্ষা করলো, এহানতে বহু বেয়াপাই স্বীকার করতারা।
ফারুখ আব্দুল্লার লগে কংগ্রেস বা রাহুল গান্ধী আত ধরেছে তাও কাশ্মীরর কট্টর পন্থীর লগরগো। তাও ৩৭০ ধারা বাতিল করেছি উহানর বিরুদ্ধে, অথার্ৎ ফারুখ আব্দুল্লা বা পাকিসআন পন্থীগো বুলিয়া বদানাম করতারা।
বিজেপিয়ে ৩৭০ ধারা বাতিল করিয়া “এক দেশ — এক আইনর” আওতাত কাশ্মীররে বরেইলাহান।
অবশ্য ৩৭০ বাতিলর পিছেদে কাশ্মীরে বহু পরিবর্তন অইল। হিল ইটানী বন্ধ অইল, হিন্দু তালকরানি বন্ধ অইল। এবাকা যেগয়ৌ কাশ্মীরে ভিটা মাটি লনা পারতাইগা। আইনর পরিবর্তন অইল। সন্ত্রাসীর আডাআগো লাল চৌক, ঔ লালচৌক উগত রাতি নঙেইত বুলে পারতারা।
কাশ্মীরর মানুর মন আহান বারো জম্মুর মানুর মন খানি আরাক তঙাল আহান। ৮ তারিখর আগে আগাম মাতানি ঠিকনেই, আইন বহিভূর্ত। উহানে বাছেইক — ৮ অক্টোবর। ৯০ হান সীটর বিধানসভাহান জম্মু কাশ্মীরর শাসন ক্ষমতাহান কার আতে যারগা চেইক।