বিহারর পরিস্থিতি হোবা নাইল

কাকেই – ২৪৩ সীটর বিহার বিধানসভার ভোট এরে অক্টোবর-বা নভেম্বরে অইতই বুলিয়া মাতানি য়াকরের। তবে এবাকাউ ইলেকশন কমিশন লেপয়া কোন তারিখ প্রকাশ নাকরেছি।
বিহারর বিধানসভার ভোটর দিন খেল ঘোষণা নাইলেও বিহারর রাজনৈতিক ফিলগো জবর গরম অ-পরিলগা বুলিয়া মাতানি য়াকরের। নেতা কিতা খুন করানি অকরলা। বিজেপি নেতা গোপাল খেমকার খুন অইল।
লোক জনশক্তি পার্টির নেতা চিরাগ পাসোয়ান আক্ষালাগই বিহারর হাবি সীটে মানু উবা করতই বুলিয়া ঘোষণা হুনুয়েইলো। লোক জনশক্তি পার্টি বিজেপির লগে জোট করেছি দলহান। কিন্তু এখুরুম বিহারর ভোট এহানাত বিহারর হাবি সীটে বা ২৪৩হান কেন্দ্রত নিজর দরর মানু উবা করতই বুলিয়া ঘোষণা দেনাই বিজেপির ভিতরেউ উমা হিজা আহান দেহা দিলো বারো নীতিশ কুমাররতাউ অশান্তি বাড়িল। যদিও বিজেপির পক্ষত্ত মাত্তারা চিরাগ পাসোয়ান এনডিএ না এরেদেছে মানে বিজেপি জোটেই আছে।
চিরাগ পাসোয়ান হাবি সীটে মানু উবা করানির ঘোষণা দেনাই নীতিশ কুমারর মুখ্যমন্ত্রী অনার সম্ভাবনা কমইল। তবে নীতিশ মুখ্যমন্ত্রী পদে বহানিরকা বারো লালুর দলে হমেইতেগাউ পারে।
বিহার বিধানসভা ভোটর আগে যেসাদে পরিস্থিতি উবা অছে মাতানি য়াকরের আরাকৌ নেতা কিতা খুন অইতাই বুলিয়া নিঙে অর।
অন্যগদে বিজেপি জোট বিরোধী হাবিয়ে একজোট অয়া ইলেকশন কমিশনর বিরুদ্ধে উবা অছি।