দলাদলি এতা জাত এহানাত থা গেলগা। আসামেউ বুলিক ত্রিপুরাতৌ বুলিক দলাদলির সীমা নেই। সাহিত্যর দলাদলি বুলতাং না মহাসভার দলাদলি বুলতাং, না গাঙঘরর দলাদলি বুলতাং। যত দিন যারগা দলাদলি এতা জবর অয়া দিয়া আহের। সমাধান অর বুলতে নার।
ত্রিপুরাত সিপিএমর আমলে বনমালী সিংহ গিরকর ঠৌরাঙে ত্রিপুরা মহাসভা রাতারাতি আলাদা সোসাইটি রেজিস্ট্রেশন আহান করানি অছিল। উবাকা কেন্দ্রীয় মহাসভাত প্রশ্ন কাহেছিল ত্রিপুরা মহাসভা আলাদা রেজিষ্টেশন করিয়া খেয়ইলা কেন্দ্রীয় মহাসভাত্ত। কেন্দ্রীয় মহাসভার রেজিষ্ট্রেশন উহানেই হাবি রাজ্য কাভার করের বুল্লা। উবাকা ত্রিপুরা মহাসভারতাই উত্তরে মাতেছিলাতা যে “না খেয়ছি, রাজ্য সরকাররাংতো সুযোগ সুবিধা পানারকা সোসাইটি রেজিষ্ট্রিশন করানি অছেতা। অবশ্য এবাকা আর ত্রিপুরা মহাসভাত দলাদলি নেয়য়া আছি রেজিষ্ট্রেশন বিছারাকুরাউ নেই। রেজিষ্ট্রেশনর কাগজ কারাং থাইল নূয়া কমিটিয়ে মাতে পারতাই বা নারতাই উহান আর বিছারানির দরকারৌ নেই।
আরাক দলাদলি আহান আছে হান স/ছ বাদীর। উতার গজে কেন্দ্রীয় মহাসভা দলা দলিলো আছিলা মোকদ্দমা চলেছিল কত্ত বছর। ডঃ দেবেন গিরকর আমলে কতর পেট্রোল পুড়িয়া পিছেদে সমাধানরকা কেইস তুলানি অইল। মহাসভার দ্বিদিহান সম্মেলন পেয়া করানি অছিল। যেতাউ অক খানি শান্ত অছিল।
মানুয়ে মহাসভা বুল্লে তিকপানি অকরলা। অইতে অইতে দুহান মহাসভা দুই মূর্তি বারো ধারণ করে আহের।
লোয়ার পেয়া সম্মেলনর আক্ আক্ উহানাত সমাজর মানুয়ে হুনেইলা মহাসভার দলা দলি সমাধান করানিরকা – মহাসভা তিলনির ঠৌরাঙ করতারা বা সমাধান পথগো ইলছে। বুলতে বুলতে বারো হুনলাং সম্মেলনর পিছেদে তিলনির বৈঠক। দ্বিয় মহাসভারে তিলনির ঠৌরাঙলো “ইয়ং ব্রিগেড” বহু ভাষণ হুনুয়েইলা। লমইতেগা “জৈসেথে’। সমাধান নাইল। আকতাই হয়তো খালকরেছিলা সম্মেলনহান কোন রকম করে বেলেইক, পিছেদে যেহান অইতই অইতই। অয়া গেলগা সম্মেলন। উতার থাংনাত শিলচর ডি. সি.গই দ্বিয় মহাসভার নেতৃবর্গরে ডাহেছিলা, কিন্তু রামকৃষ্ণ গিরক মহাসভা না য়ওছিগা।
কিন্তু এবাকা সুষ্ঠ কোন সমাধান নানাই আরাক মহাসভা আহান মূর্তি পালয়া দিয়া আহের। ত্রিপুরাতৌ সংগঠন বাড়েইতাই। হানতে এসাদে ইমে দলা দলির হাদিত ইমে জাত এহান চলিয়া থাইতাঙাই পাউরী- !
উতারৌ আগে মহাসভার বিপরীতে “সাহিত্য সভা” বুলিয়া বলি সংগঠন আহান আছিল। গিরিগিথানীয়ে নাউ পাহুরে থাইরাং উতা-।
শিক্ষিত, ডাঙরিয়া গুণী গিরিগিথানী নেতা লকেয়ে যেগদে পরিচালিত করতাই উগদে চলতাঙাই নাই গিরিগিথানী, না কিতা ? গিতেইন-তা-খিত্তা-ধেন-তা …..