ঐক্যই শক্তি

‘ঐক্যই শক্তি’ কথা এহান সমাজর গিরিগিথানী হাব্বিয়েউ হারপাছিহান। একতা নেয়ইলে দুর্বল অইতারা এহানৌ হাব্বিয়ে হারপাছিহান। ঐক্য উহানেই গনতন্ত্রর মূল ছিয়াগো। কিন্তু ঔ ‘ঐক্য’ বুলতারা শব্দ উগো আমার সমাজ এহানর ভিতরে নেই, নেই বুলতে সুপৌ নেই। দলাদলির নিয়াম এহানে কোন আগদে আগুয়ানির কোন ক্ষমতা নেই। একতা উহান থাইলেতে খানি রাজনৈতিক ক্ষমতা খানিয়ৌ পানা য়াকরলো অইস। রাজনৈতিক ক্ষমতা নেই বুলতে গাও সভার প্রধানগো পেয়া দেনা হিনপেইতারা। দাবী করানির ক্ষমতা উহানৌ নেই। এসাদে চলেছি সমাজহান।
ত্রিপুরাত্তে রাজনীতির ফিলগত খানি গজেদে কাইলে বাদর বছরে তলে লামাইতারা। ত্রিপুরাত বিজেপি আহানির বহু আগেত্ত যেতাই বিজেপি করলা উতারে পদেত্ত লামাইলা, ডেই ডেই হারা দিতারা। একতা উহান নেয়ইল থাংতে দাপা আহান উবা অয়া প্রতিবাদ করানির ক্ষমতা উহানৌ নেই। অবশ্য নিজে নিজে কামাড়া কামুড়ি দেনাত হাবিয়ৌ উস্তাদ।
ত্রিপুরার প্রাক্তন মন্ত্রী খুন অইল উগো, বিমল সিংহ, গিরকে মাতেছিল কথা আহান আছে — ‘‘পেপুড়ারে চেই, গোলাহান আইলেও গটাগো অয়া থাইলা, পানিত বাহিলেউ না মরলা”।
ঐক্য নেই বুলতে হাবিত্ত জিঙেছি জাতহান আমার জাত এহানর মানু এতা। ঔরে খায় বেইবুনিরে চেইক কিসাদে একতাহান ! সরকারে পেয়া ডরেইতারা।
বারো মুসলমানরে চেইক— লেবাননে আতঙ্কবাদী নেতা নসরুল্লাহ্ খুন অইল, হাজার হাজার মাইল দূরেইত ভারতে কাশ্মীরে বারো লক্ষেœৗত মুসলিমে হাজার হাজার মানুু নুকুলিয়া সড়কে প্রতিবাদ মিছিল করলা। উতা গণতন্ত্র !
উপমা আহান দিক — অজাগর হরপ আগরে পেপুড়াই ধরেছিতা। পেপুড়া এতারে কোনগয়ৌ নাও গণিয়ার। সাধারন পেপুড়াগোনাই ! ডাঙর অজাগর হরপ উগয়ৌ পেপুড়া এতারে গণানির কোন দরকারই নেই বা কথাই নাগয়। কিন্তু একতার গুণহান — পেপুড়া এতাই দল বাধিয়া অজাগর উগরে ধরলাথাং সুপৌ না এরেদিলা। অজাগর উগৌ না গনিয়া থাইল। কিন্তু লমইতেগা অজাগর উগরে পেপুড়া এতাই মারে বেল্লা এতা পারা জীবো এগরে। উতা অইলতাই একতার গুণহান।
আমার সমাজর ভিতরে দলাদলির সীমা নেই। সমাজর সালে ঔ দলাদলি উতা কি বেলা নুয়ারিয়ার ? অবশ্য ‘মি ডাঙর, মি ডাঙর’ বুল্লেতে ইমে জাঙর তলে থানা।